ORANJESTAD – Departamento di Impuesto ta informa cu dia 8 di december 2025 ta e ultimo dia pa entrega
e formulario di declaracion di inkomstenbelasting 2024. E extension di termino (uitstel) cu 2 luna pa esnan cu
no a logra entrega nan formulario dia 1 di october 2025, ta caduca y lo no tin mas extension, pa asina
mantene e ritmo di trabao cu Departamento di Impuesto a stipula pa procesa restitucion.
Entrega e declaracion di inkomstenbelasting ta un obligacion legal. Door di entrega e declaracion segun
instruccion di ley, e contribuyente ta evita cu e ta haya un cobransa (taxativo) cu boet. Ademas pa medio di e
declaracion, e contribuyente ta haya e oportunidad pa haci uzo di su derecho di deduci su gastonan.
Por entrega e declaracion di inkomstenbelasting 2024 na oficina principal na Camacuri durante e siguiente
orarionan di trabao: 7.45 – 11.30 y 1.15 – 3.30. Ta conseha e contribuyente pa saca un copia di e
declaracion prome cu entrega esaki pa su mesun administracion.
Pa mas informacion por tuma contacto cu Departamento di Impuesto na e siguiente numbernan di telefon:
522 7423 of 522 7424. Contribuyentenan por sigui tambe e noticianan oficial di e departamento riba
Facebook: https://www.facebook.com/impuestoaruba/ of via www.impuesto.aw pa asina keda bon informa.

Gerencia di Departamento di Impuesto
2 di december 2025