Recientemente den oranan di anochi a drenta informe na Maritieme Operatie Centrum di Guarda Costa un yamada di e Central di Polis na Curaçao cu un turista Chileno ta perdi den lama. E turista tabata riba un Kayak yena di aire y a sali for di Piscadera baai. Door di e lama bruto ela perde e rema pa cual e no por a sigui Kajak. Mientrastanto ya caba e tabata mas di 2 milla nautico for di costa. E MOC mesora a dirigi e cutter Jaguar y e avion di Guarda Costa cu urgencia na e direccion di e turista perdi cual door di e coriente keto bay a sigui hib’e ta drief mas leu. E dama turista porfin a ser mira door di cutter Jaguar riba su kajak y a bin trece te na e waf di Guarda Costa. E dama tabata sinti frieuw, pero por lo demas e tabata bon di salud.
Guarda Costa ta sugeri pa tur e botonan nabegando den vecindario di Curaçao pa nan tene cuenta cu e lama brutu e dianan aki. E dianan prome tabata tin olanan halto y lama brutu inespera. Esaki por trese situacionnan peligroso pa tur embarcacionnan. Percura pa bo ta bon prepara si bo mester subi lama. Controla si tur e medionan di comunicacion ta funciona bon, cu vestnan di salbabida pa tur esnan abordo y semper tuma e medidanan di seguridad. Si no tin mester di subi lama, Guarda Costa ta conseha keda na tera.