Dos aña y mey pasa, Horacio Oduber Hospital (HOH) a inicia hunto cu HAN University na Hulanda e master opleiding Physician Assistant (PA). E estudio di PA ta uno bastante popular na Hulanda y sigur tambe uno interesante pa Aruba mirando e retonan existente na Aruba relaciona cu e disponibilidad di dokternan y tambe e tremendo beneficio di tin e funcion aki na hospital y den cuido medico en general. E prome studiante cu tabata interesa y a inscribi e tempo ey tabata Gianina de Freijtas. Despues di un trayecto intensivo pero cu hopi animo y empuhe ela logra slaag cu hopi orguyo como e prome Physician Assistant na Aruba dia 7 di april.

 

Gianina de Freijtas, Physician Assistant na poli gynaecologie, a expresa di ta hopi contento y agradecido can HOH y HAN University di a brind’e oportunidad pa haci e estudio aki desde Aruba mes. Aunke uno basta pisa tin biaha mirando e diferencia den ora, mirando cu tin dia ela cuminsa for di 3:00 am pa asina atende e lesnan y banda di esaki sigui sigui traha y tambe studia, incluso core stage. Mayoria stage e por a haci na Aruba mes pero algun biaha e mester a bay Hulanda tambe. Awo Gianina ta contento di ta bek y ta traha “full time” na poli gynaecologie unda e ta atende pashentnan y asisiti e specialistanan.

 

Lenie Denteneer, manager HOH Academy, ta conta cu e estudio aki ta uno amplio y ta dirigi na e cuido directo di e pashent. Na momento cu e profesional termina su estudio e lo por traha independiente pero tambe asisti un specialista ora mester y haci gran parti di e tareanan cu un dokter ta haci. Esaki lo por alivia cierto peso di e trabou cu e dokter of specialista ta haci y asina por yuda tambe cu escasez di dokter cu ta un reto mundialmente. HOH Academy ta mira hopi oportunidad den esaki pa esnan cu ya tin un educacion riba nivel di Bachelor den cuido pa sigui specialisa y asina crece den nan funcion y responsabilidadnan. Como resultado di e colaboracion exitoso cu HOH tin cu HAN University, a inicia tambe un PA den cardiologia y un PA den cirugia aña pasa y a caba di palabra cu lo sigui brinda oportunidad pa un PA den urologia y pa departamento di emergencia. Asina lo sigui brinda oportunidad tur aña pa nos profesionalnan den cuido.

 

Geert van den Brink, coordinador di e Masteropleiding aki na HAN University of Applied Sciences na Hulanda, a splica cu na Hulanda, ta uza e rol di Physician Assistant ampliamente como un complemento dentro di e teamnan medico, contribuyendo asina na continuidad den cuido. E esfuerso entre e dos instancianan aki a culmina exitosamente na Aruba cu e graduacion di Gianina, marcando un paso importante pa fortalece y modernisa e sector di cuido medico na Aruba.

 

Pa finalisa, Gianina de Freijtas a indica cu e educacion ta amplio mirando cu e ta traha na poli gynaecologie y ta asisti e specialistanan pero tambe ta traha hopi independiente. Gianina ta gradici HOH, HOH Academy y su famia cu a dun’e sosten y e oportunidad pa asina yega na e bunita logro aki den su carera

 

Un otro paso padilanti pa loke ta adopta innovacion den educacion pa Horacio Oduber Hospital y Aruba.