E curso di baseball5 ta den full swing, unda instructornan profesional di “World Baseball Softball Confederation” (WBSC) ta dunando un curso na 25 participante. Banda di e expertonan tecnico di e deporte, a ricibi dos otro profesional cu ta traha cu WBSC cu a bin cu e proposito pa reuni cu e federacionnan local pa trata e tema di maneho di deporte. COA a facilita e contactonan cu WBSC pa por a hasi posibel cu Amateur Baseball Bond Aruba (ABBA) y Aruba Softball Bond (ASB) por a reuni cu e federacion internacional pa asina trata diferente tema importante den cuadro di maneho.
E federacion Internacional WBSC a percura pa manda e personanan indica pa un tarea importante manera esaki, unda ta conta cu Victor Isola, cu ta e liaision pa e contintente Panamericano y ta traha cu tur federacion miembro. E ta percura pa e bon comunicacion y apoyo di entre WBSC y e federacionan nacional. Hunto cu Victor a bin Marco Ienna, cu ta e “Chief Operating Officer” (COO) di WBSC, cu ta hunga un rol clave den e areanan di gobernansa, integridad, anti-doping y responsabilidad social. Cu e 2 profesionalnan aki y nan experticio den e diferente areanan di importancia pa maneho di un deporte na nivel nacional, a logra hiba un dialogo ameno pa asina duna informacion y mira con por aplica y ahusta esaki na Aruba.
Durante e reunion a cuminsa na splica e situacion actual di Baseball y Softball na Aruba, dunando contexto na e situacion. Ademas di esaki a conta kico e plannan di futuro ta, e plan strategico cu ta desaroyando y kico kier logra a largo plaso, pa asina yuda na mehora e structura di ambos deporte localmente. Victor y Marco a tuma bon nota di e situacion na Aruba, y a duna diferente recomendacion a base di e structura actual di WBSC, ademas di usa nan experiencia y conocemento di traha cu tur federacion miembro di region pa duna ehempelnan di con por haci cierto cambionan desea. Finalmente Victor y Marco a presenta diferente projecto y documento cu ta duna bon informacion y conocemento practico pa yuda mehora e nivel di maneho.
Un tema asina importante no ta logra wordo resolvi den un reunion, pues lo sigui cu mas reunion durante e proximo dianan pa logra intercambia mas tanto informacion y contenido posibel pa logra yega na eleva e nivel di baseball y softball na Aruba.
#COA #ARUBA #WBSC #ABBA #ASB
