Studiante di Universidad di Aruba a investiga sargaso y microplastics rond di nos costanan

Oranjestad, Aruba,  2 Oktober 2026: Josianne Vrolijk, un studiante di Bio-Environmental Sciences den e programa SISSTEM na Universidad di Aruba, a defende su tesis di BSc (Bachelor of Science) cu exito, investigando e relacion entre contaminacion di sargaso di lama y microplastics riba nos costanan.

 

Cu e titulo di su tesis, “Pelagic Sargassum as a Potential Vector for Microplastic Contamination in Aruban Coastal Sediments”, Josianne a analisa si sargaso cu ta caba na nos costanan ta contribui na e transporte y distribucion di microplastics.

Josianne a colecta y compara microplastics for di sargaso y sedimentonan na ocho beach panort y tres beach pazuid di nos isla. E particulonan di plastic a wordo segmenta den tamaño, forma, color y tipo di plastic. Esaki a duna informacion basico di contaminacion di microplastics na e diesun lugarnan aki na nos costanan.

E estudio tambe a haya diferencianan den nivelnan di microplastics entre sedimentonan di beachnan panort y pazuid cu of sin sargaso. Tumando tur esaki hunto a mustra cu e relacion entre sargaso y microplastics ta uno complica. E resultado principal ta cu sargaso cu a yega recien ta mustra di tin microplastics distinto, mientras cu microplastics di sargaso mas bieu ta parce mas riba e microplastics di sedimentonan rond di dje. For di e resultadonan e ta evidente cu nos tin mester di mas investigacion riba con microplastics ta wordo transporta y redistribui na canto di nos costanan rond di Aruba.

“Islanan chikito ta wordo afecta directamente dor di problemanan manera sargaso y contaminacion di plastic, dus e ta importante pa nos mes investiga,” Josianne a enfoca durante su presentacion.

E investigacion ta destaca SISSTEM su enfasis riba ciencia cu ta localmente relevante y ta enfoca riba islanan, combina cu investigacion riba tera, analisis di laboratorio pa busca solucionnan pa problemanan ambiental y atende cu retonan cu ta afecta nos Aruba y alabes yuda otro islanan cu ta enfrentando retonan similar.

Josianne a completa su tesis bou di guia y evaluacion di su supervisor Dr. Nigel John, e segundo evaluador Sra. Kryss Facun y examinador externo Sr. Tobia De Scisciolo.

Despues di su Bachelor, Josianne tin e plan pa sigui un Master cu tambe enfoca riba islanan, pero na Universidad di Groningen na Hulanda. E lo sigui construi ariba e conocemento ambiental y experiencia cu el a desaroya cu ayudo di SISSTEM.

E logro di investigacion di Josianne ta demostra con investigacion di un studiante na Universidad di Aruba por contribui na e desaroyo di capacidad cientifico local pa asina hunto nos logra di tin mihor herment cu ta laga nos maneha e retonan ambiental cu nos isla chikito Aruba pero tambe otro comunidadnan insular chikito ta enfrenta.