Departamento di Cultura Aruba (DCA) y Departamento di Enseñansa Aruba (DEA) a ricibi
bishita di historiador Adolf “Dufi” Kock, kende a entrega dos di su obranan cu ta contribui na
documentacion y preservacion di historia di Aruba.
E publicacionnan entrega ta “Seccion Historico di Aruba” y “Mision di Marineronan Noruega
(Vuykstekestraat 23, San Nicolas), Aruba”. E entrega a wordo haci na drs. Siegfried Dumfries,
Director di Departamento di Cultura Aruba, y na Sra. drs. Sheila Maduro, Director Interino di
Departamento di Enseñansa Aruba.
E buki “Seccion Historico di Aruba” ta dedica na nos hobennan, nos futuro generacion. E
publicacion “Mision di Marineronan Noruega” ta dedica na Su Excelencia Gobernador, Sr. Juan
Alfonso Boekhoudt. Ambos obra ta enfatisa tambe e contribucion na nos dushi idioma
Papiamento.
E entrega aki ta un aporte balioso pa acerca nos comunidad na su historia y pa stimula interes
den nos herencia cultural. Documentacion historico ta yuda nos compronde miho nos pasado,
fortalece nos identidad y transmiti conocemento na generacionnan venidero.
Cu e meta pa haci e obranan accesibel pa un publico mas amplio, den futuro cercano lo pone e
bukinan disponibel pa comunidad di Aruba via nan plataformanan digital. Asina, studiantenan,
maestronan, investigadornan y tur persona interesa lo por consulta nan y amplia nan
conocemento di nos historia.
Departamento di Cultura Aruba y Departamento di Enseñansa Aruba ta expresa nan gratitud na
Sr. Adolf “Dufi” Kock pa e entrega y pa su dedicacion na documentacion di historia di nos isla.
Su aporte ta contribui na mantene nos memoria colectivo bibo y na acerca nos historia na nos
pueblo.