Ayera nochi a tene e reunion di despedida pa e delegacion di TEAMARU cu lo bay participa na e “Youth Olympic Games” (YOG) Dakar 2026. Cualkier participacion na un evento Olimpico ta special, pero esun aki ta extraordinario como e e ta e prome edicion historia pa ser organisa na e contintente di Africa. TEAMARU su delegacion cu lo bay Dakar, Senegal ta conta cu 3 atleta cu lo bay participa y un delegacion total di 8 miembro cu lo bay representa Aruba.
Durante e reunion, Patrick Werleman a duna un splicacion amplio di tur e informacion general di e Weganan YOG. Patrick tabata encarga cu tur preparacion logistico y administrativo pa Dakar 2026, pues a prepara tur cos pa nos delegacion. Pa cu e parti tecnico, a haya un splicacion di e Directora Tecnico alabes Hefe di Mision pa e Weganan, Monica Fajardo. Aki a conta e eventonan cu cada atleta lo bay participa aden, ademas di duna di conoce ken e entrenadornan ta cu lo bay acompaña e atletanan y e ekipo di apoyo cu lo bay pa Comite Olimpico Arubano (COA).
TEAMARU ta conta cu atleta di Natacion, Ocean van Loon y Mikaela van den Berg y di atletismo lo bay Eden Antersyn. Tur 3 atleta a mira un aña cu participacion na diferente Weganan pa asina ta bon prepara pa e reto grandi aki. Hunto cu entrenador Ismael Santiesteban di Natacion y Silvienne Krosendijk-Valdez di atletismo, a haci un proceso di preparacion productivo pa asina por haci nan maximo esfuerso na Dakar. Hunto cu Monica lo bay Roberto Chavarria como tecnico – fisioterapista y Yerica Benitez Cordero cu lo percura pa manda pa Aruba tur contenido den su rol como Press Attache.
Finalmente a duna di conoce cu e abanderadonan pa e Weganan YOG Dakar 2026 lo ta nos atletanan di Natacion, Ocean y Mikaela. Ambos atleta lo mira accion den e prome siman y lo ta presenta pa e Ceremonia di Apetura, unda lo hisa bandera di nos Pais cu orguyo y dignidad. COA ta desea e delegacion hopi éxito cu gran reto y cu nos mustra mundo henter cu apesar di ta un isla chikito den Caribe, nos impacto ta grandi!
#COA #TEAMARU #YOG #DAKAR #OLYMPICS
