Booshi Wever: ATROBE TIN UN “UITSTEL VAN EXECUTIE”, MIENTRAS CU NO TA TRAHANDO NA “AFSTEL VAN EXECUTIE” PA LOKE TA TRATA “AANWIJZING

”.

Relaciona cu e supuesto “aanwijzing” cu e siman aki lo tabatana caminda, e “uitstel” di un luna e biaha aki parce di a crea reaccionnan mixto  aki na Aruba, incluso den seno di e fanaticonan di coalicion POREDmep.

Di un banda nos ta sinti cu tin cierto euforia, mientras cu di otro banda tin gritonan cu ta varia di “subi caya”, “accion”, “demostracion” y te hasta di esnan cu a cuminsa realisa cu no tin mucho mas pa haci y cu ta bisa “laga e KB bin numa” y ban deal cu ne y considera cu esaki ta un KB cu a bin pa e desaster causa pa Mike Eman y su gang di Alibaba, cu pa UPP ta inclui Otmar Oduber tambe.

Hunto cu henter e modus operandi aki di gobierno Hulandes, por medio di Secretario di Estado Knops y CAft, nos ta haya e presion ta wordo aumenta mas riba Aruba cada bes “uitstel” y ta wordo secunda pa parlamentarionan Hulandes manera Bosman (VVD) y van Dam (CDA). E prome kier menasa cu Hulanda ta sali for di e Statuut y e di dos ta menasa pa pone husticia Arubano bou curatela Hulandes. Na ambos nos lo kier bisa hopi cla” “Ga Elders Plukken”.

E derecho INALIENABEL di AUTODETERMINACION  di cada pueblo ta ancla den varios resolucionnan di Nacionnan Uni! Esaki ta un derecho EXCLUSIVO di un colonia, cu paisnan colonisador NO POR MISHI cune. Ni cuanto André Bosman c.s. purba bin spanta balente! Ta hustamente esaki Hulanda tambe a concorda despues di Segunda Guera Mundial, pa evita cu e tin di raporta na Nacionnan Uni anualmente. Ta e pueblo ARUBANO so por dicidi ki dia ta bandona Reino. Pero, ora nos kier haci uzo di e derecho aki, nos mester ta consciente si cu nos tin OBLIGACION tambe, esta e.o. GOBERNA DRECHI. Nos mester mustra mundo henter cu nos ta MERECEDOR di ta un pais SOBERANO!

Esaki UPP a bin ta bisa caba desde su lantamento. Nos a adverti desde 2014 caba, cu si nos mes no ta sera un frente Arubiano pa enfrenta Hulanda nos lo wordo re-colonisa. Esaki dor di nos mesun culpa, pasobra den situacionnan asina, nos ta prefera di goza di e fracaso di otro. Asina na 2015, prome cu CAft a bini, nos a mustra cu tur loke nos gobierno a bin ta pasando aden ta debi na nos mesun actuacionnan. Nos a mustra con e tempo prome cu 2009, AVP y Mike Eman tabata “heul” cu enemigonan Hulandes, manera un Brinkhorst (D66) cu tabata propaga cambio di Statuut di Reino. Despues nos por a wak un Eveline Wever-Croes cu, enbes di a percura pa crea un frente aki na Aruba, a scohe pa core hiba un rapport Hulanda cu yama “Feestvierend ten onder gaan”. 

Mientras nos tur a bay campaña 2017 primintiendo un gobernacion drechi, pa nos mes mes y pa e Hulandesnan stop di mete cu nos, parce cu nos no kier haci esaki realmente y asina nos mes ta percura pa nan keda mete cu nos. Mescos cu ta culpa Hulanda awor aki di kier impone, nos mester ta consciente tambe di ta kendenan ta e culpabelnan di esaki y kendenan a permiti esaki. Y mas ainda, kico realmente a wordo haci pa por lo menos mitiga e situacion aki? Pa baha e debe? Pa baha e presion Hulandes aki? A stop di tuma hende den servicio? No! A para mal gobernacion? No! E debe a baha? No! Djis sigui tira culpa nos no ta logra nada. Bira independiente lo cambia e situacion pa nos? No! Pasobra e situacion lo bira pio cu e mannan di e politiconan full los. 

UPP a presenta desde 2014 caba, tempo cu Mike Eman, lider di Otmar Oduber, a bay den su famoso welga di hamber, como unico partido politico cu tabata tin sentimentonan mixto pe e hecho cu Hulanda a “grijp in” den asuntonan netamente interno di Aruba, pa crea un frente, un pacto nacional pa asina hunto cu partidonan politico y tur gremionan nos mustra Hulanda cu nos mes ta “ruim op” nos mes un “boel”!!  E tristeza di mas grandi ta cu awe, esun cu e tempo ey tabata di “hubilo” pasobra Hulanda a “grijp in”, ta pasando tambe dor di e dolor aki awor!

Nos ta kere, cu e idea di un COMPROMISO NACIONAL, cu UPP a lanza na 2014 y a purba pa bini cune, pa asina crea e confianza cerca nos pueblo cu como gremio politico nos ta cla pa realisa e cambio y pa mustra Hulanda cu nos ta dispuesto pa “take care” di e caso cu Mike Eman a hinca Aruba aden, ta un opcion valido ainda. Apesar cu “the clocking is ticking even harder” cu 4 pa 5 aña pasa. Tanten cu ta keda wak e “jugo politico” cu por saca for di e situacionnan aki y scohe pa un acercamento indivualista y egoista, nos lo sigui sinti e rosea cayente di e politiconan Hulandes den Tweede Kamer y di gobierno Hulandes. E alargamento di un situacion asina, ta haci tambe cu nos pais ta keda ingobernable. Mientras cu no ta realisa cu mester tuma pasonan pa drecha gobernacion, baha gasto etc., nos lo sigui haya sindicatonan cu lo sigui exigi tur sorto di cos, pasobra nan no ta convenci cu gobierno ta seriamente bezig ta drechando e situacion. Ta duel nos bisa, cu cambio di gobierno, pueblo ainda no a mira cu tin mucho cambio. 

Gobernando nos pais drechi, nos por bisa André Bosman y tur esnan cu kier hunga neo-colonialista cu “voz en cuello”: “GAELDERS PLUKKEN”!!

17 di oktober 2019

Booshi Wever

Brazil 163

Share:

Leave a Reply

Your email address will not be published.