Famia ta anuncia fayecimento di e ‘Cantor di Pueblo’ Vicente Kelly

Diasabra mainta famia y pueblo di Aruba a ricibi e noticia lamentabel cu e gran artista stima Vicente Kelly a bay laga nos. Na un edad respeta di 69 aña Vicente a pasa su ultimo tempo na Huize Maristella. Vicente Kelly ta un legendario musico y compositor cu a significa hopi pa e cultura di Aruba. Conoci pa su forma unico di toca cu acordeon e la alegra hopi generacion. Su composicionan semper a hala atencion sea pa ilustra su amor pa e isla di Aruba of pa tin letranan chistoso. Vicente hunto cu su bandanan; Los Juveniles, La Nueva Fuerza y Los Pimentosos pa varios generacion a participa na varios festival y a toca na centenares di fiesta y concierto. Den exterior tambe Vicente a sa di gana curason di hopi cu su presentacionan unda semper a la hiba Aruba su nomber den su curason. Como tata tambe Vicente tabata un homber cu semper a stima su yuinan y e dedica tempo na cada un di nan talentonan. Vicente ta tata di Carolyn Kelly, Elton Kelly, Reynold Kelly y Ariane Ojeda Kelly. E tabata tin un total di 8 nieto y nieta y tawata casa cu señora Elvia Kelly.

Biniendo bek riba e parti di cultura algun di sin fin di exitonan cu Vicente a sa di crea ‘Santa Cruz’, ‘ Polin tin Shete Buraco’ , ‘Den scochi bo mama’, ‘Djaca den trampa’ y hopi otro cancionan cu a bira un exito riba nos isla como tambe den exterior.

Aruba sigur lo sinti falta di un baluarte di nos cultura.

Den e siguiente dianan lo comparti e detayenan pa cu e forma cu lo dispidi di Vicente.

Cu Vicente descansa na paz.

Share:

Leave a Reply

Your email address will not be published. Required fields are marked *