Recientemente, e Centro di Coordinación y Rescate di kustwacht (RCC) a recibi un informe di e RCC na Puerto Rico di cu tin un boto ta drief den e area di buskeda y rescate di e Guarda Costa di Caribe. E boto a sali 4 dia prome, pero tabata tin mala suerte na caminda. E RCC di e la Guarda Costa a tuma contacto mesora cu e RCC Centro di Coordinacion y Rescate na República Dominicana pa obtene mas informacion riba e boto, pero desafortunadamente e RCC no tabata tin informacion adicional eynan. Guarda Costa su RCC a purba conecta cu barconan cu tabata cerca di e boto pa por yuda e e boto. Mientras tanto, e RCC tambe a señala e avion di Guarda Costa e ubicacion di e boto cu tabata drief y cu tabata basta milla panort di Aruba. Ora a yega na e sitio indica e avion di Guarda Costa a tuma nota di un boto chikito cu 3 persona abordo.
E barconan Anemone y Cala Pedra a posiciona nan mes cerca di e embarcacion flotante y a contacta cu Guarda Costa su RCC y a indica cu nan por yuda e personan cu tabata den e boto. E barco Cala Pedra ta e prome cu a yega na e sitio, pero nan no tabata tin e recursonan pa yuda e personan cu tabata den e boto. E barco a permanece cerca di e boto flotante te ora cu e barco Anemone a yega na e lugar. Na su yegada, e marineronan finalmente por a aborda Anemone y tresnan a ser rescata. Unabes abordo di e barco Anemone, e marineronan a declara cu nan ta di República Dominicana y cu nan tabata drief durante 10 dia. Nan tur tabata bon di salud y nan a ser baha pa e barco Anemone na Aruba teniendo en cuenta tur e medidanan relaciona cu e virus.
