Minister Ruiz-Maduro ta felicita Clarette Quandus cu su publicacion ‘Elegante Poeta’

Oranjestad  Desde diabierna ultimo, mundo di literatura y amantenan di poesia por enrikece nan coleccion cu un otro publicacion di un buki di poema na Papiamento.

Durante di un ceremonia na Biblioteca Nacional di Aruba,Clarette Quandus a presenta y bautisa su di cuater buki di poema na Papiamento

Ruby Eckmeyer a dirigi palabra na nomber di Minister di Cultura, Xiomara Ruiz-Maduro, cu no por tabata presente nae ocacion special aki.

E trayectoria di Clarette como poeta ta algo impresionante. Clarette tin tur loke cu el a haci riba tereno di skirbi poema bon warda y bon documenta. Banda di cu Clarette ta un persona cu tin hopi contacto cu otro poetanan di Aruba, Boneiro, Corsou y na Spaña, e ta haci tur esfuerso pa bishita algun di nan personalmente tambe. Clarette semper ta percura pa hopi hende haya sa di su publicacionnan y pa e motibo aki tambe e tin hopi bon contacto cu miembronan di prensa riba tur e islanan di habla Papiamento.

‘Elegante Poeta’ ta consisti di un total di 19 poesia. Clarette a cuminsa skirbi e coleccion di poema aki den aña 2018, cu tabata Aña di Papiamento na Aruba.  

Minister Ruiz-Maduro ta felicita Clarette Quandus cu e publicacion nobo aki y ta desea Clarette hopi exito cu un otro publicacion.

Share:

Leave a Reply

Your email address will not be published.