In Memoriam: Nos tata, nos guerero, Bill Tromp a bay laga nos

Awe, dia 24 di september, 2020, nos tata, nos guerero, un bon casa pa nos mama, Bill Elliott Tromp, a pasa di e mundo terenal pa e mundo spiritual.

Bill Tromp tabata un persona hopi activo durante su bida, te den su ultimo momento e tabata activo cu e grupo di oracion Voice of Jesus.

Un tiki di su trayectoria

Bill a nace dia 11 di mei, 1949. E tabata e yiu di mas chikito  di Angel (Chona) Tromp y Gudelia Tromp-Lacle. E mes tabata tin 7 ruman mas grandi cun’e.

Bill tabata manera nan ta bisa den boca di pueblo, un mala mucha, mirando cu e no tabata riña pa ningun hende y semper tabata tin un contesta riba cada pregunta of “insinuacion” cu tabata haci den su direccion.

Como un hoben adulto, el a sa di milita den varios banda musical, entre otro The Flat Tops di San Nicolas, como tambe The Young Adventure, caminda cu el a sa di toca na varios fiesta hunto cu e tempo ey Sensacion del Caribe, como banda di relevo, pero naturalmente tocando rock y baladanan di momento.

Como profesional, el a traha for di 1966 na Telefoondienst, cu despues a bira SETAR y na 2003 ,el a baha cu pensioen, despues di un trayectoria largo y exitoso, net prome cu SETAR a bira Sui Generis.

E tabata un luchado incansabel kende tambe cu su 28 aña a participa na Augustus Scur, caminda cu Aruba tabata den un periodo hopi turbulento den su historia politico.

Como un “thespian”, e tabata miembro di e organisacion teatral Mascaruba y a wordo nombra como miembro honorario di e grupo. El a sa di actua den varios obra teatral y a biaha pa diferente pais den e continente Americano, for di Norte America, pasa Mexico y sigui pa Sur America.

Tambe e tabata director di De Trupialen, den añanan 80 cu tin cu bisa a rebiba Teatro Harlekino y a bin cu un era nobo pa e grupo, cu ta existiendo caba for di 1955.

Na aña 2010, Bill a skirbi su prime buki cu ta ilustra e prome 50 añanan di telefon na Aruba, cu un historia extenso, for di prome cu a bin e desaroyo industrial na Aruba, te cu añanan 50. Apesar cu e gana tabata tey pa skirbi un continuacion, pero e no a logra yega asina leu.

Despues, na aña 2003 el a muda bay Hulanda pa un temporada di mas of menos 3 aña, despues cu el a baha cu pensioen, pa e desaroyo educacional di su yiu homber, pa despues na 2006, el a bin bek y hiba un bida como un hubilado, haciendo varios proyecto y naturalmente, biahando, cual ta un di su pasionnan.

Por ultimo, e tabata un voluntario cu Voice of Jesus, caminda cu el a demostra su devocion pa Mama Maria y tambe na nos Amigo y Sirbidor Hesus te na final di su dianan. E tabata haci di tur un poco, wantando buki, haci mantenimento, traha programa tur siman y tambe pa e fiestanan di santo. El a traha durante e recaudacionnan di fondon. 

Bill den un nutshell, tabata un homber multifacetico y semper al dia cu lo ultimo di tecnologia y semper pendiente di noticia local y internacional.

Un renaissance man cu cada biaha tabata reinventa su mes no solamente pa su propio conocemento, pero tambe pa su famia.

Papi, danki pa tur loke bo a siña nos. Bo tabata un tata ehemplar cu semper tabata tey pa su famia.

Bo yiunan, Lia y Joshua, casa Ida y nietonan Gillian y Cylienne

Share:

Leave a Reply

Your email address will not be published.