Dos adulto y un baby herida den accidente riba brug di Piedra Plat
Diasabra anochi un poco despues di 7.30 ta bati alarma pa otro accidente riba brug di Piedra Plat. Diabierna anochi ya caba tabatin un accidente eynan cu tres auto envolvil. Personanan na e sitio a cuminsa yama Brandweer y ta bisa cu mester bini cu materialenwagen pa motibo cu e autonan a dal frontal y tin un persona cu no por move pasobra el a keda pega den auto. Informacion inoficial ta bisa cu tabata trata di pasamento di auto entre un Yaris y un Alteeza mas prome y yegando e brug, e chauffeur di e Yaris no a logra drenta su banda na tempo y a dal frontal den un Honda, cu tabata biniendo di Sta Cruz y bayendo direccion di Piedra Plat. Den e ultimo auto aki tabata tin un homber na stuur, y ta compaña pa su yiu muhe y nieto. Despues di e accidente e mama mes a subi un auto y a bay hospital cu e baby di 2 aña.E cabayero den e Yaris tabata sufri di masha dolor pa motibo, ya cu e autonan a dal frontal, su pianan a pega na e parti dashboard. Bomberonan a tarda pa corta e porta y otro partinan di e auto pa sak’e, mientras cu e tabata sclama di dolor.