Chauffeur sin rijbewijs a dal auto contra palo di luz na Bloemond

Diasabra, pa mas of menos 2’or y 45 di marduga, chauffeur den un Toyota Corola, coriendo riba e caminda di Bloemond pa Tamarijn, pa motibonan desconoci, a baha for di caminda y a dal contra di un palo di luz, un tiki p’ariba di Bloemond Supermarket.
E chauffeur a declara na prome instante cu un cacho lo a cruza su dilanti. E auto mes tabata tin sla, no solamente na man drechi, caminda cu el a dal den e palo di luz, pero tambe na e banda robes parti dilanti.
Fuera di esey, e tire robes parti patras tabata full flat y riba riem.
Polis na e sitio a constata cu e chauffeur no tabata por a papia mucho cla y tampoco por a mustra un rijbewijs valido, pa cual motibo polis a detene e chauffeur y a hib’e warda.
Mientras tanto e auto a keda pega contra di e palo di luz. Por a ripara cu e schoordraad a bin abao door di e impacto.
Elmar a presenta na e sitio pa asina por traha riba e daño causa na e palo di luz debi na e accidente.

Share:

Leave a Reply

Your email address will not be published.