Diaranzon atardi a drenta informe di un atraco arma na Caya Tumba, mesora a dirigi varios patruya na e sitio. Na yegada di e patruya a bin compronde cu aki lo ta trata di un “set-up” unda lo tin un deal pa bendemento di un celular pero ora e victima a yega na e sitio indica e atracador tambe a yega y diripiente a saca arma di candela y a exigi pa tur su pertenencianan di valor y ora a haya esakinan e atracador a core bay drenta mondi y desaparece. E atracador ta un persona color scur bisti cu un regenjas preto. Atraco Team a ser avisa y inmediatamente a dirigi nan mes na e sitio. Durante e buskeda den e area a bin topa algun hoben cu lo por a cuadra cu e descripion duna pero ora a confronta nan cu e victima esaki a nenga cu lo por ta nan, despues di basta rato y buscamento sin resultado polisnan a sigui cu nan patruya y atraco team a tuma e caso over.
