PROME MINISTER A REUNI CU INFORMADORNAN

“Gobierno di Aruba tin confiansa cu for di e proceso democratico aki Aruba lo tin un gobierno stabiel pa por enfrenta e retonan cu tin nos dilanti”

Despues di e resultado di eleccion dia 25 di juni, Aruba a drenta e fase di formacion di un gobierno nobo. Gobernador a tuma e prome paso den e proceso aki y despues di consulta cu lidernan politico y diferente gremio a apunta dos informador cu ta sr Eddy Werleman y sra Tisa LaSorte. E dos informadornan a haña como tarea pa sondia cerca e partidonan politico cu a haña asiento cu ta MEP, AVP, MAS ,ACCION 21 y RAIZ, con pa forma un gobierno stabiel cu un sosten amplio den parlamento y cu ta bay duna contenido y pone enfasis riba e recuperacion economico y socio-economico di nos pais y ehecucion di e acuerdonan cu Hulanda. 

Den surso di dialuna informadornan a reuni cu partidonan RAIZ, MAS Y ACCION 21. Y den curso di diamars ta reuni cu MEP y AVP. Prome Minister Evelyn Wever-Croes hunto cu Presidente di Partido MEP Hendrik TeVreden a reuni cu informadornan 9or di diamars mainta na unda cu Prome Minister a duna di conoce cu tawata tin intercambio di ideanan hopi importante pa continuacion pa un proximo gobernacion di MEP den gobierno.

“Gobierno di Aruba tin confiansa cu e proceso democratico aki lo duna e resultado cu nos tur ta sperando cu Aruba lo tin un gobierno stabiel pa por enfrenta e retonan cu tin nos dilanti. E proceso ta manera nos consitucion ta stipula y e siman aki diahuebs, e 21 Parlamentarionan nobo cu a wordo scogi lo huramenta pa asina durante e fase transitorio por tin un Parlamento nobo”, Prome Minister a duna di conoce.

Remarcable ta cu durante e fase transitorio 4 minister lo ta alaves parlamentario; Evelyn Wever-Croes, Xiomara Maduro, Dangui Oduber y Glenbert Croes. Nan lo keda eherce nan funccion como minister den e fase transitorio y mes momento lo funciona tambe como parlamentario. 

Prome Minister Evelyn Wever-Croes: “No ta premira cu e formacion lo bay tarda hopi mirando cu ta parse e proceso di formacion ta canando den bon caminda”.

Share:

Leave a Reply

Your email address will not be published.