Despues di a reuni cu Comite Olimpico Arubano (COA) y e federacionnan miembro Aruba Baseball Bond Aruba (ABBA) y Aruba Softball Bond (ASB) durante e ultimo dos dia, dirigentenan di World Baseball Softball Confederation (WBSC) a reuni cu Minister di Deporte mr Gerlien Croes. Como e partner esencial cu a percura pa e federacion Internacional bin Aruba pa entre otro e reunionnan importante aki y e curso di Baseball5 cu a wordo duna, a conta cu presencia di Secretaria General di COA Sra. Nicole Hoevertsz. Di parti di WBSC a bin Victor Isola, cu ta e liaision pa e contintente Panamericano y ta traha cu tur federacion miembro. E ta percura pa e bon comunicacion y apoyo di entre WBSC y e federacionan nacional y Marco Ienna, cu ta e “Chief Operating Officer” (COO) di WBSC, cu ta hunga un rol clave den e areanan di gobernansa, integridad, anti-doping y responsabilidad social. WBSC a conta cu un miembro mas di nan directiva, Aruba su propio Randolph Oduber cu tambe a forma parti di e combersacion. Durante e combersacion ameno aki a conta un poco di e curso di Baseball5 cu a tuma luga, ademas di e diferente reunionnan cu e stakeholdernan local pa asina trata di yuda mehora e nivel di maneho di ambos deporte. Locual a resalta ta e importancia di trata e temanan di statutonan, buena gobernansa y un mehoracion den e structura di e federacionnan, pa asina por yega na un miho nivel di maneho cu lo aporta na desaroyo di ambos baseball y softball. Tur stakeholder sinta na mesa a duna di conoce di kier traha hunto pa por logra esaki, cu WBSC indicando un compromiso pa yuda den diferente manera, manera mas ayudo a base di intercambio di informacion, capacitacionnan y mas curso pa tur esnan den e comunidad di e deportenan. Finalmente a yega na e acuerdo cu ambos deporte merece tur e apoyo necesario di tur partner envolvi, y lo bay traha mas di cerca cu e federacionnan local pa asina logra yega na un miho structura cu lo traha riba mehoracion di tur aspecto dentro di un organisacion deportivo. WBSC ta hopi contento pa mira un Comite Olimpico Nacional y un Minister di Deporte cu ta compronde kico ta necesario pa por logra esaki y ta mira e colaboracion entre tur partner como algo cu sigur lo trece e cambionan na benificio di deporte na Aruba. #WBSC #MinKOJIS #ABBA #ASB #Sports