Kudawecha/Calabas – Den e famoso y mundialmente famoso Domino Square Garden, lo ta bay tin un torneo interesante awe diabierna 23 di october, cuminsando pa 8 or. Ta trata di e formato “5 X 5”. Tin tres ekipo lo participa awe ’nochi, esta BIBA LEKKER DT, TAXI BOYS DT, y CASHERO HILLS.

Lider di Biba Lekker, Tony Trimon, a splica algo dje formato aki. Lo tira lot y dos team lo enfrenta otro hungando 1 wega riba 5 mesa. Despues dje prome rondo ey, e otro team lo enfrenta e team cu a score menos wega den prome rond; y su siguiente rond, e dos teamnan cu no a enfrenta otro ainda ta hunga e ultimo buelta.

Di aki nan ta saca e dos teamnan cu a score mas hopi wega, y e dos ekiponan aki ta bay p’e gran final riba 5 mesa. Pa compronde miho, cada rond ta consisti di 5 wega te 100, cada wega riba un mesa apart, dus 5 mesa. En total, den rondo preliminatorio, lo tin 15 wega (A vs B; A vs C; B vs C), y e gran final lo tin 5 wega; un total pues di 20 wega p’e anochi.

Manera semper, entrada pa publico ta completamente gratis, y durante pauze, snacks lo lora a pedir de boca totalmente por nada. Bini un, bini tur bin experiencia e formato unico y exclusivo n’e mundialmente famoso Domino Square Garden, aya net n’e grens entre Kudawecha y Calabas. Yegaaa!