ADRIENNE TROMP TA BIRA E PROME PROFESIONAL PA HACI SPECIALISACION DI BOTICARIO NA ARUBA MES.

Botica di Servicio Eagle ta e prome Botica den Caribe cu ta ricibi e certificacion aki.

 

ORANJESTAD: Diabierna atardi Minister Endy Croes hunto cu colega Minister Dangui Oduber tabata presente na e celebracion di certificacion di Botica di Servicio.  Recientemente Botica di Servicio Eagle a ricibi e certificacion ‘Harmonisatie Kwaliteitsbeoordeling in de Zorgsector’ (HKZ) segun normanan di ISO 9001. Botica di Servicio Eagle ta bira asina e prome botica den Caribe cu ta ricibi e certificacion aki.

Minister Endy Croes tabatin honor pa anuncia e sitio di training y pa dirgi al algun palabra. E mandatario a expresa di ta masha orguyoso di por forma parti di un momento asina special y di por anuncia awe cu desde awo aki na Aruba, na Botica di Servicio por sigui cu e specialisacion pa Boticario. Sra. Adrienne Tromp ta e prome Arubiano pa cuminsa cu esaki na Aruba. Antes esaki tabata posibel solamente na Hulanda. E specialisacion pa Boticario ta un specialisacion ankra den ley na Hulanda mescos cu cualkier otro specialisacion di dokter. E mandatario a sigui bisa cu pa por haci e estudio aki, lo mester a finalisa e ‘Master Farmacie’ y mester tin e diploma di Boticario. E estudio tin un duracion di 2 aña extra. Nos yiunan di tera awor tin e opcion di bin bek cas mas trempan despues di nan estudio di Boticario y haci nan specialisacion aki mes na cas y asina contribui na e cuido medico di nos pais Aruba.

 

E mandatario a sigui bisa cu su vision y maneho como Minister di Enseñansa y Deporte ta consisti di 3 pilar. PEN 2030- Doorlichtingrapport cu aanbeveling pero sigur SDG 4 Sustainable Development Goals di Nacion Uni cu e agenda 2030 den cual ta promove hopi ‘Lifelong learning’ y competencianan di Siglo 21; creatividad, comunicacion, pensamento critico y colaboracion

 

 

Pa finalisa Minister Endy Croes ta felicta hunta di maneho, directiva, staf y personal di Botica di Servicio Eagle pa nan vision asina innovativo liderando cu proyecto asina bunita cual ta brinda oportunidad na nos ciudadano y profesionalnan pa keda studia y eleva nan conocemento cual lo traduci su mes  alabes mes den un miho calidad di cuido pa nos  sociedad. Masha pabien y exito!

Share:

Leave a Reply

Your email address will not be published.