Calabas/Kudawecha – Shonnan amante di “cutting edge” domino, e diasabra aki 13 di augustus wak pa bo reserva bo kruk “lulush-lulush” en antemano n’e unico y mundialmente famoso Domino Square Garden aya net n’e grens entre Calabas y Kudawecha, pa bo no perde e sambombaso atomico entre e dos teamnan mas hot den bush league, esta TEAM SNOR vs PARIBA LEGENDS DT! Un bataya sumamente interesante y emocionante cu tin ta brouw desde aña pasa caba den “wandelgangen” di domino!

Detaye saliente di tur e caso aki, ta bay ta e hecho cu e famoso y conocido doctorandus den domino, “Snor” Perez, t’e padrino di bautismo dje team Pariba Legends, cual team a wordo funda aña pasa door di nada menos cu dos hungado di Team Snor, esta Nigel “Chuffy” Sint Jago, a.k.a. Walishali, y Wilson Richards. Un nota chikito na banda: un investigacion preliminar te ainda no a duna resultado ta di unda y pakico e bijnaam “Chuffy” y “Walishali” a sali. Nos lo keda pendiente pa resolve e misterio aki. Den un entrevista exclusivo, “Snor” Perez, kende por cierto ta celebra e hecho cu muy pronto e lo yega e bunita edad di 60 aña, a splica cu p’e keto bay ta un honor p’e por ta padrino di Pariba Legends, pero cu e biaha aki si e como “Godfather of Stones” tin cu baha cu man duro ora di bati piedra ariba mesa, pa demostra cu semper bay Team Snor ta number uno, y Pariba Legendslo keda number dos! E cos aki pues ta bay bira un caso di pone hende na nan luga y pone nan “zing een toontjelager”!

Prome cu nos sigui, nos mester humildemente rectifica un fout chikito cu nos a haci den nos relato anterior, caminda a referi n’e capitan di Team Snor como Captain Margo. E nomber corecto mester ta Captain Magda, y nos tin entendi cu p’e bataya importante aki, nada menos cu e implacable Captain Magda lo tin e timon dje barco duro wanta atrobe pa asina domina e gang feroz bou liderazgo di nada menos cu Junior Simmons!

Wel shonnan, wanta duro p’e evento aki! Porta lo ta habri desde 7’or di anochi caba y manera di custumber entrada y e famoso pasapalonan lo ta completamente gratis! Es mas, Chef Han a dicidi di bay all out cu snacks diasabra awor 13 di augustus, cuminsando pa 8’or di anochi, p’e encuentro ta anticipa entre Team Snor y Pariba LegendsDT. No perde e clash barbaro aki, yega!