Diaranson mainta a drenta informe di cu un homber kende lo ta ser considera peligroso y ta conosi pa cana arma tin un muher secuestra y maltrata na un cas na Noord Cura Cabai, mesora a dirigi patruyanan na e sitio. Na yegada di e patruyanan nan a rondona e cas di tur skina y a cuminsa negocia pa e homber libera e muher. Despues di basta papiamento a bin resulta cu aki lo no ta trata di un caso di secuestro pero si maltrato unda e muher lo a sali tur blausea y maltrata, polis a pidi pa ambulans y esaki a presenta pa atende e victima. Despues polis a sigui persisti pa e entrega su mes pero e no tabata kier. Polis a pidi pa manda e team special di aresto pa asina drenta y saca e homber afo. Net ora e team special a yega e homber a sali di patras cana bin dilanti y entrega su mes. E homber tabata tin un tas cun’e den cual e por tin e arma di candela y ora e tabata entregando su mes polis a ordene pa tira e tas ey leu y hisa su mannan na halto. Ora ela cumpli cu esey mesora nan a boei e y hib’e pa warda di polis.