Un Baluarte hopi stima pa nos Partido y pa pueblo di Aruba

Diamars mainta a drenta e tristo noticia cu un Baluarte di nos partido como tambe di nos pais a bay sosega na edad di 74 aña, señor Harry Croes. Harry Croes ta un persona hopi conoci y stima pa e comunidad di Aruba. Diamars anochi, Lider di MEP, Evelyn Wever-Croes acompaña pa algun candidato y sostenedonan di nos Partido, a reuni na Cede di MEP pa un momento solemne pa recorda e gran personahe Harry Croes. Den su palabranan cu yen di emocion, Lider di MEP a conta den corto e legado cu señor Harry a laga pa nos Partido y pa pueblo di Aruba.

 

E partida di Harry tawata un shock pa nos tur. Un noticia hopi tristo pa nos Partido. Harry semper tawata cla pa yuda Partido MEP. El a yuda tur Lider di Partido MEP. Pa nos Partido, Harry ta un Baluarte. El a dedica su bida na nos Partido. El a pasa hopi tempo di su bida na Cede di MEP, sea ta pa atende miles di reunion durante trayectoria di Partido, pa campañanan electoral, pa selecciona candidatonan nobo, pero tambe simplemente pa hunga domino cu compañeronan di lucha y amigonan di bario di Santa Cruz. Harry Croes a biba e momento di Augustus scur y el a conta e storia aki miles di biaha pa asina e keda bibo den memoria y historia di nos pais.

 

Pa Aruba tambe Harry ta un Baluarte, den cultura y den deporte. E motor tras di Festival di Dande. Harry Croes tawata hopi stima no solamente den e bario di Santa Cruz pero pa henter Aruba.

 

Partido MEP a considera oportuno pa bin hunto e anochi aki y duna un homenahe na Harry na e luga na unda cu tur aña, 17 di maart y algun minuut prome cu 12or, prepara e bandera pa asina net 12or di 18 di maart, hisa e bandera di Aruba di mas grandi na Aruba, cu tambe tawata un iniciativa di Harry.

 

Esaki ta un tradicion di Partido MEP riba Dia di Himno y Bandera cu cada aña ta bira mas emotivo ora cu pa 12or di anochi habri nos dia nacional y wak e bandera di mas grandi di nos dushi Aruba wordo hisa y bula na laira, cu e meson emocion di e deseo cu Harry tawata tin den su curason, pa cada un di nos stima nos pais y pa ta orguyoso di nos pais y di e simbolonan di identidad y libertad di nos pais.

 

Nos lo sigui recorda Harry. Nos ta gradici Harry inmensamente hopi pa tur loke el a haci pa nos Partido. Lider di MEP, den nomber di Partido MEP ta desea señora Ligia, yiunan, demas famia, e famia di MEP y tur cu a conoce Harry Croes, hopi forsa y cu señor Harry Croes sosega na paz.