En conexion cu celebracion di su cumpleaño dia 5 di December:
INVITACION PA MINI EXPO DI LIDER DI MEP TITULA ‘RELAHA Y RECARGA’
Lider di MEP, Evelyn Wever-Croes ta invita abo y bo famia pa bin celebra su cumpleaño hunto cu n’e diamars 5 di december 2023 na Cede di MEP di 7or pa 9or pm. Alaves Lider di MEP lo comparti algun di su cuadranan den un (mini) expo titula ‘Relaha y Recarga’.
Meimei di responsabilidadnan como mama, wela, yiu, Lider di un Partido y Prome Minister di nos pais, cu ta exigi resiliencia, dedicacion y un fuente di energia sin limite, Evelyn Wever-Croes ta busca den creatividad un manera pa relaha y recarga. Y asina, un poco mas cu un aña pasa, el a cuminsa pone ritmo di color riba canvas. Y segun Lider di MEP, esaki realmente ta yud’e relaha y recarga energia. E esfuerso creativo aki, ta un mensahe profundo tambe pa nos pueblo; un lider politico y un lider di un pais no solamente mester enfoca riba su trabounan incansabel y duro, sino nan ta ciudadanonan cu mester forsa nan mes pa busca tempo pa relaha y recarga.
Diamars 5 di December, CEDE di MEP ta bira un galeria di arte, unda cu mas o menos 35 cuadra di Lider di MEP lo pinta e murayanan di color y inspiracion. Lo tin algun cuadra na benta, y e fondonan recauda ta bay pa e proyecto “Alegra Pasco” di famianan di menos recurso. Reserva e fecha y disfruta di mini expo ‘Relaha y Recarga’ y alaves
haya e oportunidad di haci un famia feliz.
