ORANJESTAD – Recientemente a installa sra. Zulema Dabian-Erasmus como e Minister Plenipotenciario pa Merca y Canada pa e siguiente 4 aña. Como e representante di Aruba na Washington DC e tin como tarea pa sirbi e interes di pais Aruba riba diferente tema.

Un tema di importancia ta e tema di Educacion. Gobierno di Aruba a traha duro e ultimo añanan pa ofrece studiantenan di Aruba cu ta caba scol secundario, oportunidadnan pa continua nan estudio na Merca y Canada na un manera mas pagabel. Sra. Zulema Dabian-Erasmus lo kier continua cu e trayecto aki.

Na e momentonan aki tin alrededor di 105 studiante cu Arubalening na Merca y 35 studiante cu Arubalening na Canada. No ta tur studiante na Merca y Canada sinembargo tin un Arubalening. Ademas pa motibo di privacy, Departamento di Enseñanza na Aruba no ta comparti detayes di contacto di e studiante.

Den cuadro di estrecha lazonan cu studiantenan na Merca y Canada, sra. Zulema Dabian-Erasmus ta acerca studiantenan di Aruba pa manda nan contacto (nomber, institucion na unda ta studia, number di telefon, mail). E informacion aki lo ta util na momento di comparti oportunidadnan di scholarship y exchanges, posibel bishita na e cuidad y pa organiza eventonan di encuentro. Si tin interes pa comparti e detayes di contacto, por manda esaki na zulemadabian@outlook.com.