• 

• 

• 

• 

• 

Den e siman di September 29, 2019 – October 6, 2019 Federacion Internacional de Domino (FID) a organisa e di XVI Campeonato Mundia di Domino. E seleccion di Aruba a participa na e Mundial di Domino cu a tuma lugar na Cabo San Lucas, Mexico. E seleccion di Aruba a wordo forma door di 17 atleta di e diferente equipo nan:

• Noord Stars “PIZZA HUT” DT: 7 hungador
• X-treme DT: 2 hungador
  
• Old Parr DT: 2 hungador
  
• Gold Stone Dewars DT: 2 hungador
  
• Trappers DT: 2 hungador
  
• Sport Boys DT: 2 hungador
  

E contribucion di Aruba a consisti tambe di un referee certifica den persona di Stanley Cicilia pa e campeonato.
Total tabata tin casi 400 participante di diferente pais. Pa nombra algun di e otro pais nan: Abkhazia, Russia, Republica Dominicana, Panama, Venezuela, Curacao, Costa Rica, USA, Mexico, Colombia etc. Den e Mundial di Domino atleta nan por a competi den e categoria di Individual y e categoria di Equipo (4 persona competi hunto).  E atleta nan di Aruba a presta hopi bon y a saca cara.
Den e ramo di Individual mester menciona cu Miguel “Water Man” Tromp a raspa te na final pa caba cu un record di 11 gana y 4 perdi pa logra posicion 18 den casi 400 participante. Nos mester splica cu di posicion 7 te cu 21 tur e atleta nan tabata tin 11 gana y 4 perdi, pero e efectividad a determina e sequencia di e ranking. Un pabien ta bai na Miguel cu su prestacion sublime.
Aruba a competi tambe den e categoria di Equipo. Aki “Aruba – 2” (consisti di Marc Yarzagaray, Felipe Danjo, Donovan Kock y Andy “Badu” Farro) a keda cu 30 wega gana y 18 perdi loqual ta bon pa lugar 8 den e casi 100 equipo nan participante. Marc Yarzagaray y Felipe Danjo ambos a bai di 8 – 4, Donovan Kock y Andy Farro tur dos a bai 7 – 5. Aki ta prome biaha cu Aruba ta cai den premio den e torneo di Equipo. Nos no por keda sin menciona Magda Kock cu den e categoria di Equipo, pa su equipo, a bai 9 – 3; esaki sigur ta un prestacion fenomenal. Nos ta manda un caluroso pabien pa henter seleccion di Aruba cu e hazaña y logro nan grandi aki.