Kudawecha/Calabas – Fin di siman ultimo tabata tin e gran debut di ekipo Cashero Hills den liga “wild west” di domino aya n’e famoso y unico Domino Square Garden na Kudawecha. E team di “Casherianonan” no a kies pa haci un debut suave si no a kies pa bay top di biaha! Nada menos cu Team Snor t’e “seleccion” cu nan a dicidi di challenge! Wel, conociendo lider maximo “Snor” Perez, no tin nodo di ripiti, ta di biaha e ta bisa bo “menciona ora y fecha”!

Fecha a bira diasabra ultimo, 27 di juni; ora si a “hala” un tiki pasobra kier a caba di wak prome mita di Portugal vs Colombia. Varios a puntra pakico tin un standbeeld para memey di veld, a resulta cu ta Ronaldo tabata para ta warda bala. En todo caso, ora cu e wega di domino porfin a cuminsa, Snor kiermen el a sinti manera un “blue wave” pasa riba dje, pero un “blue wave” di Alcolado Glacial! Di tur skina por a tende e gritonan di “Cashero!” resona den e Square Garden, y den “no time” Cashero ta 7-1 dilanti!

E pesadiya ta sigui sin misericordia ora ya Cashero ta yega score impresionante di 10 – 2, faltando 1 punto so mas pa halftime drenta! Pero, Team Snor ta lanta foi dje “winterslaap” y ta cuminsa pasa algun sapato blanco p’e corta bentaha te na 11-7! Halftime ta psa caminda pueblo en general por a goza di snacks completamente gratis cortesia di Domino Square Garden su chef!

Di dos tempo, a ripara cu algun integrante di Cashero Hills a bira style di Hulanda ora nan ta gana cu 2-0. Nan actitud a bira style di “nos a gana caba” y mayoria nan atencion a bay riba futbol di Argentina. Snor ta hari den cachete ora su trabuconan a cuminsa planta respet estilo Alemania riba Corsou! E unico grito cu tabata resona tabata “SNOR! … SNOR! … SNOR!” y den un frega di wowo Team Snor ta dilanti cu 19 – 13! Waw! Na Hulanda nan sa bisa “niet gepiest, maar toch nat”! Na final e ultimo “SNOOOR!” tabata cortesia di Juni cu Jeff “The Boss” kendenan a score 21 – 14 pa manda Cashero Hills cas bay refleha, uza yoga, y medita ta kico por a bay fout den nan debut! All in all, keda pendiente si pasobra despues di mundial, ora no tin mas “distraccion”, Cashero a laga sa cu “They will be back”!