FRACCION MEP: E siman aki lo entrega ley di screening Ministers na presidente di Parlamento pa asina e por wordo trata.

Un investigacion di Banco Central a accentua cu den comunidad ta biba e percepcion cu e grado di corupcion bou politiconan ta halto. Ademas algun siman pasa nos a wordo confronta cu e di dos caso, investigacion Avestruz, di corupcion di e gabinete anterior lidera pa Mike Eman. E siman aki Parlamentarionan Edgard Vrolijk LL.B y Rocco Tjon MBA ta haci entrega di e ley di screening Ministers y Minister Plenipotenciario (landsverordening integriteit ministers).

LANDSVERORDENING INTEGRITEIT MINISTERS

E ley aki ta regla screening di candidatonan pa bira minister y Ministers. E ta duna un base legal pa entre otro e investigacion di seguridad nacional y esun di Husticia por bay mas profundo. Pa ley lo bira posibel cu formador of Minister President por apunta un comishon cu por haci un investigacion pa wak si un persona ta ministeriabel y si un Minister por keda den funcion.

Ademas di esaki e ta bira obligatorio pa ley cu un Minister y su famia mester duna un relato financiero di tur nan propiedad y bienes. Un investigacion fiscal y un investigacion pa constata transaccionnan irregular tambe ta forma parti di e screening.

CASTIGO

Den e ley a incorpora tambe articulonan den cual ta determina e castigo pa un candidato Minister, Minister y su famia cu di un of otro manera ta viola e obligacion cu e ley aki ta pone riba nan. Castigonan ta varia te cu 4 aña di prison. Mester tuma bon nota cu castigo pa actonan coruptivo cu un mandatario comete ya caba ta regla den nos leynan di codigo penal.

MINISTERIABEL OF NO?

Pa garantisa integridad di gobernacion e ley aki ta nombra e motibonan (“uitsluitingsgronden”) pa cual un persona no por wordo nombra Minister. Personanan por ehempel cu a wordo sentencia pa un crimen of ta sospechoso den un investigacion penal no por bira Minister. Parlamentarionan Vrolijk y Tjon ta haya esaki sumamente importante pa garantisa integridad di gobernacion y na mes momento pa restaura confiansa den politiconan.

PA CONCLUI

E siman aki e ley aki ta wordo entrega na tur Parlamentario. Den un reunion di comishon central lo dicidi e ora cuanto tempo cada Parlamentario ta haya pa haci pregunta y despues lo fiha un fecha pa trata e ley. Den e simannan nos dilanti Parlamentarionan Vrolijk y Tjon lo sigui duna splicashon riba e ley importante aki.

Share:

0 thoughts on “FRACCION MEP: E siman aki lo entrega ley di screening Ministers na presidente di Parlamento pa asina e por wordo trata.

  1. Tremendo iniciativa I ley encuanto di screening ,monitoreo di futuro personal di e organo mas importante di pais Aruba I mandatarionan responsabel encuanto maneho di e pais concerni ,AVP hamas I nunca no lo sali positivo di e screening ,awor mester “hurry up” pa pasa e ley !

Leave a Reply

Your email address will not be published.