Opinion: Reaccion riba declaracion di diasabra ultimo

Nos, docentenan preocupa di Colegio San Nicolas, a tuma nota di e declaracion haci durante conferencia di prensa en conexion cu covid diabierna ultimo 4 di juni 2020 na unda a wordo declara cu Colegio San Nicolas ta keda un scol Publico y no ta wordo traspasa pa de Schakel y ta keda mane e ta awo. Tambe a wordo declara cu minister ta bin cu un management team y hunto cu docente lo bay den dialogo e siguiente 12 lunanan pa mira si despues di esey e scol lo kier bay over pa bira un scol cu ta brinda tweetalig onderwijs.

Nos ta puntra nos mes kico p.e. ta encera e periodo di 12 luna pa sa si nos ta bira scol bilingual of no?
Pakico ta insisti pa un management team maneha Colegio San Nicolas? Un AVO (enseñansa secundario general) no conoce e termino management team sino rector y conrector. E cuerpo di docente di CSN no ta desea un management team sino mas bien un rector y conrector. Un di e motibonan di esaki ta pasobra den un management team por involucra cualke persona cu diploma di management y cu no sa nada di educacion, no sa con pa anda profesionalmente cu adolescentenan y no sa kico ta come y bebe na e scol.

Nos docentenan preocupa kier mira e MB y desicion tuma den Minister Raad fecha 26 di mei 2020 tocante Colegio San Nicolas bira invalido, den poco palabra, declara nulo. Nos kier mira por escrito cu Colegio San Nicolas no lo bay bou di Stichting Onderwijs Combina of bou di otro stichting ni pa e proximo aña escolar, ni pa 2021-2022 ni den futuro. Un scol cu ta cay bou di stichting por nenga un alumno a base di criterianan cu nan pone, sinembargo un scol publico no lo nenga facilmente pa un alumno cu ta cumpli cu e citerianan stipula den ley pa drenta e scol. Asina eseñansa ta keda accesibel pa hopi alumno.

Docentenan preocupa tambe a tuma nota cu Minister Lampe a bisa via un presentacion live di facebook bou di e programa Hallo minister Lampe dia 4 di juni 2020 cu un dia den transcurso di e siman di 8 pa 12 di juni lo papia cu docentenan di CSN. Nos docentenan ta pidi pa e fecha y orario concreto y puntonan di discusion pa e encuentro e siman aki, pa por yega na un solucion pa CSN, su alumnonan y docentenan.

Share:

Leave a Reply

Your email address will not be published. Required fields are marked *