Prome Minister Evelyn Wever-Croes: E FUTURO DI UN ECONOMIA CIRCULAR DI ARUBA

Oranjestad –Diabierna a tuma luga na The Ritz Carlton Aruba e conferencia organisa pa di 4 biaha pa Banco Central Aruba riba e tema di innovacion, ‘4th Annual Future of Innovation Conference’. Prome Minister tawata un orador invita e mainta aki y a cuminsa su discurso gradiciendo Banco Central di Aruba cu e iniciativa importante cu e topico principal di e desaroyo di Economia Circular na Aruba. Presente na e conferencia tawata bishitantenan di Merca, Hulanda y Trinidad & Tobago.

CBA ta colaborando den diferente desaroyo riba e tereno innovativo na Aruba. E siman aki, tawata tin e prome Siman di Innovacion Nacional, ‘Immerse Innovation Week’ na unda cu e isla na un gran forma a celebra innovacion y colaboracion pa logra e Metantan di Desaroyo Sostenibel (SDGs) pa 2030. Prome Minister a expresa di ta orguyoso di ta parti di e iniciativa bunita aki y ta hopi satisfecho cu CBA ta un partner di y ta un motor di e movimiento di innovacion sostenibel na Aruba. Pa Gobierno di Aruba, innovacion sostenibel ta parti integral di nos vision, aspiracion y maneho. Pa cua motibo, Prome Minister a indica cu te hasta prome di a asumi su puesto como Prome Minister, el a haci e compromiso pa pone innovacion como e curason di maneho.

Tambe Prome Minister a felicita CBA pa e lansamento di e Scol Cibernetico y pa nan compromiso pa yuda siña nos muchanan e habilidadnan importante di siguridad di internet. Esaki ta un ehempel practico cu e ser humano ta central den nan enfoke pa innovacion. Y resiliencia cibernetico ta un punto principal pa logra un economia circular.

Economia circular a wordo identifica como un di e sectornan prometedor di Aruba. Con nos por haci nos economia mas resiliente? Aki ta unda cu e adopcion di un plan di economia circular ta hopi prometedor. Economia circular ta enfoca riba cera circulonan pa crea un economia interno mas fuerte. For di e maximo re-uzo di materialnan te cu bira autosuficiente den e campo di produccion di energia, awa y alimentacion. Un Economia circular ta reduci importacionnan y ta mehora e balansa di pago. E ultimo aki ta instrumental pa nos posicion di reserva estranhero. Economia circular ya no ta un topico sin mas cu ta relevante pa sostenebilidad. E ta igualemente importante den e sentido monitario.

Na Aruba ta haciendo hopi pa implementa nos vision riba economia resiliente. Y Gobierno di Aruba ta compremeti pa logra esaki. Esaki nos no por logra nos so. Tur contribucion ta yuda pa e vision wordo realisa. Y ideanan cu ta wordo treci den e forum aki ta bon bini.

“Cu nos pais ta dilanti decisionnan sumamente importante pa nos futuro no ta un secreto. Y mi sa cu ora cu tin retonan grandi, esaki por crea inkietud y tin ora e ta bira dificil pa kere cu nos por logra cosnan grandi. Nada no ta imposibel. SI tin reto. Tin hopi reto. Pero tin hopi cos positivo pasando rond di Aruba. Ami ta fielmente kere cu trahando hunto nos por logra nos vision Aruba. Y cu pasonan firme y sigur, e futuro resiliente y circular cu Aruba merece lo bira un hecho. Nos no tin tempo di perde mas, nos mester di boso tur y mi kier haci un yamada special na nos sector priva pa traha hunto cu nos. Tuma accion concreto. AWO ta e momento pa nos bini hunto y uza nos espirito creativo cu semper tey pa logra nos metanan”, tawata e palabranan cu Prome Minister Evelyn Wever-Croes a expresa na final di su discurso na e ‘4th Annual Future of Innovation Conference’.

Share:

Leave a Reply

Your email address will not be published. Required fields are marked *