Ling legacy

E siman aki famia Ling a haci entrega di nan buki, titula ‘Ling Legacy: A Journey of Family, Food and One Happy island. Biblioteca a haya 3 ehemplar, pa su Dept. Arubiana, biblioteca publico na Playa y tambe uno pa biblioteca na San Nicolas. Famia Ling a bishita Dept. Arubiana pa haci un entrega personal. Riba potret ta wak nan hunto cu coleganan di Dept. Arubiana, hefe di Dept. Arubiana, sra. Des Croes y directora di BNA, sra. Astrid Britten.

E buki ta un bunita presentacion di famia Ling y nan historia, trabou, famia y nan bida. Tambe un tiki di historia di China como tambe Aruba. Famia Ling ta yama e buki ‘A labor of love’ den prologo. E produccion ta rico na material visual y ta bay bek 4 generacion. Tambe tin un capitulo riba tur e empleadonan cu a traha na supermercado Ling & Sons.

E idea pa compilia tur material y skirbi un buki di famia tabata di Sra. Ingrid Ling, casa di Clifton Ling pero despues esaki a bira un proyecto di famia y a desaroya den un publicacion pa mas hende por disfruta di dje. 

Famia Ling na 2016 a lanta ‘The Jordan Ling Foundation’. E meta principal di JLF ta pa yuda mas tanto posibel promove cuido di personanan cu ta sufri di Salud mental na Aruba como tambe duna mas informacion di salud mental. E buki ta dedica ‘in loving memory’ na Jordan Ling y e fondonan recauda ta baypa e fundacion JLF. E bukinan lo ta obtenibel den librerianan local y tambe na e fundacion ya menciona. Miembronan di biblioteca por fia esaki pronto.

Share:

Leave a Reply

Your email address will not be published. Required fields are marked *