Theodora Gruijters a nace dia 14 di juni 1933. Na edad di 18 aña ela drenta klooster di e ordo di Dominicanesnan di Bethanië y dia 30 di april 1952 a tuma e nomber di Zr. Hélène Joseph.
Zr. Hélène a traha y biba un periode cortico den e kinderhuis na Canada prome cu a muda pa Aruba dia 12 di april 1960.
Zr. Hélène a biba y traha na Aruba pa 26 aña den Cas Marijke na Kinderhuis Imeldahof y a regresa Hulanda bek dia 11 di december 1986.
Na Hulanda e a biba basta tempo den Klooster na Teteringen y despues a muda pa Magdalenahof na Haelen, unda cu despues di un periodo cortico di enfermedad, dia 3 di juni 2023 a fayece trankilo den su soño na edad di 89 aña.

Nos ta gradici Dios pa tur e añanan di amor y dedicacion cu Zr. Hélène a duna pa e pueblo di Aruba, educando nos muchanan na Imeldahof.
Zr. Hélène semper lo wordo recorda pa ta un persona cu a stima Aruba, Kinderhuis Imeldahof, su muchanan y cu semper a keda carga Aruba den su curason door di a keda dirigi su mes na nos den nos idioma Papiamento.
Directiva di Fundacion Kapel di Bethania y tur su voluntarionan ta gradici pa e atencion y aprecio cu Zr. Hélène a mustra nos y e sosten cu a duna na nos exposicion y projectonan.

Directiva di ‘Stichting Kinderhuis Imeldahof’ y ‘Fundacion Kapel di Bethania’ ta manda un invitacion pa un Santo Sacrificio di Misa den Kapel di Bethania, naklooster Imeldahof, diahuebs 8 di juni venidero pa 6:30 di atardi pa intencion di descanso di Zr. Hélène.